ក្រសួងមហាផ្ទៃ បណ្តេញមន្ត្រីនគរបាលសក្តិ៤ម្នាក់ នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ចេញពីក្របខ័ណ្ឌនគរបាលជាតិ

(ភ្នំពេញ)៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញប្រកាសបណ្តេញ មន្ត្រីនគរបាលសក្តិ៤ម្នាក់ នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ចេញពីក្របខ័ណ្ឌនគរបាលជាតិ ដោយមូលហេតុបោះបង់ចោលការងារ។

មន្ត្រីនគរបាលដែលត្រូវបណ្តេញចេញនោះ មានឈ្មោះ វរសេនីយ៍ត្រី តូច ឡាវីណូរ៉ង់ អត្តលេខ ៥៤៩៥៦ ចំពោះប្រាក់បៀវត្ស និងរបបឧបត្ថម្ភផ្សេងៗ ត្រូវបានកាត់ផ្តាច់ និងលុបចេញពីក្របខ័ណ្ឌមន្ត្រីនគរបាលជាតិ ចាប់ពីខែ មីនា ឆ្នាំ២០១៧ តទៅ។

សូមជម្រាបថា កាលពីខែកញ្ញា​ ឆ្នាំ២០១៦ សម្តេចក្រឡាហោម ស ខេង ក៏បានចេញប្រកាសបណ្តេញមន្ត្រីនគរបាល ៣រូបនៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ចេញពីក្របខណ្ឌនគរបាលជាតិផងដែរ បន្ទាប់ពីបោះបង់ការងារ។

មន្ត្រីទាំង៣នាក់នោះរួមមាន៖ អនុសេនីយ៍ទោ ព្រំ ឧកញ្ញា, អនុសេនីយ៍ទោ ឡេង សំអាត និងព្រិន្ទបាលទោ ញ៉េប សុផាណារិទ្ធ៕





Fresh News